Mark 8

UJesu Usuthisa Abayizinkulungwane Ezine

1Ngalezozinsuku kwaphinde kwabuthana elinye ixuku labantu. Kwathi ngoba bengelalutho lokudla uJesu wabiza abafundi bakhe wathi kubo, 2“Ngilosizi ngalaba abantu; sebebe lami okwezinsuku ezintathu kodwa bengadli lutho.

3Ngingababuyisela emakhaya belambile bazayatha endleleni ngoba abanye babo bavela kude.”

4Abafundi bakhe baphendula bathi, “Kodwa kungaphi endaweni ekhatshana kangaka lapho umuntu angathola khona ukudla okwaneleyo ukubapha?”

5UJesu wababuza wathi, “Lilezinkwa ezingaki na?” Bathi, “Eziyisikhombisa.”

6Wasetshela abantu ukuthi bahlale phansi emhlabathini. Esezithethe izinkwa zosikhombisa wabonga, wazihlephula wazipha abafundi bakhe ukuba baqhubele abantu. Lakanye benza khonokho. 7Babelezinhlanzana ezimbalwa njalo; wazithandazela lazo wathi abafundi kabazabele abantu.

8Abantu badla basutha. Ngemuva kwalokho abafundi badobha imvuthu kwagcwala izitsha eziyisikhombisa.

9Ababekhona kwakungamadoda azinkulungwane ezine. Esebabuyisele emakhaya, 10wangena esikepeni labafundi bakhe baya emmangweni waseDalimanutha.

11AbaFarisi beza baqalisa ukumbuza uJesu. Bamlinga ngokuthi kabatshengise isibonakaliso esivela ezulwini. 12Wakhokha umoya ngamandla wathi, “Kungani isizukulwane lesi sicela isibonakaliso esingummangaliso? Ngilitshela iqiniso kakulasibonakaliso esizasiphiwa.”

13Wasesuka kubo wabuyela esikepeni wachaphela ngakwelinye iphetsheya.

Imvubelo YabaFarisi LoHerodi

14Abafundi bakhohlwa ukuza lesinkwa ngaphandle kwesisodwa ababelaso esikepeni.

15UJesu wabaxwayisa wathi, “Qaphelani. Lilimuke imvubelo yabaFarisi lekaHerodi.”

16Bakhulumisana ngalokhu bathi, “Utsho ngoba singelasinkwa.”

17UJesu wakunanzelela ababekukhuluma, wasebabuza wathi, “Kungani likhuluma ngokungabi lasinkwa na? Lilokhu lingaboni njalo lingazwisisi na? Izinhliziyo zenu sezintunyile na? 18Kungani lithi lilamehlo lehluleke ukubona, lilezindlebe lehluleke ukuzwa? Kalikhumbuli yini? 19Ngize ngihlephulele abayizinkulungwane ezinhlanu izinkwa ezinhlanu labutha izitsha ezingaki zemvuthu?” Bathi, “Ezilitshumi lambili.”

20“Ngize ngiqathele abayizinkulungwane ezine izinkwa eziyisikhombisa labutha imvuthu kwaba yizitsha ezingaki na?” Baphendula bathi, “Eziyisikhombisa.”

21Wasesithi kubo, “Lilokhu lingezwisisi yini?”

Ukusiliswa Kwesiphofu eBhethisayida

22Bafika eBhethisayida, abanye abantu baletha indoda eyayiyisiphofu bancenga uJesu ukuba ayibeke isandla.

23Wasithatha isiphofu leso wasibamba ngesandla wasiholela ngaphandle komuzi. Esekhafulele emehlweni aso wasibeka izandla uJesu wabuza wathi, “Kukhona okubonayo na?”

24Sathalaza sathi, “Ngibona abantu; bakhangeleka njengezihlahla ezihambahambayo.”

25UJesu waphinde wabeka izandla zakhe emehlweni ayo indoda leyo. Amehlo ayo asevuleka, ukubona kwayo kwalunga, isibona zonke izinto kakuhle. 26UJesu wayibuyisela ekhaya layo wathi, “Ungayi edolobheni uyokhuluma ngale indaba.”

Ubufakazi BukaPhethro NgoKhristu

27UJesu labafundi bakhe baya emizini eduze leKhesariya Filiphi. Besendleleni wababuza wathi, “Kambe abantu bathi ngingubani?”

28Baphendula bathi, “Abanye bathi unguJohane uMbhaphathizi; abanye bathi ungu-Elija; njalo abanye bathi ungomunye wabaphrofethi.”

29Wasebabuza wathi, “Kodwa lina-ke? Lithi ngingubani?” UPhethro waphendula wathi, “UnguKhristu.”

30UJesu wabaqonqosela ukuthi bangatsheli muntu ngaye.

UJesu Ukhuluma Ngokufa Kwakhe

31Waqalisa ukubafundisa ngokuthi iNdodana yoMuntu imele ihlupheke kakhulu yaliwe ngabadala, labaphristi abakhulu labafundisi bomthetho lokuthi kwakumele ibulawe kuthi ngemva kwezinsuku ezintathu ivuke njalo. 32Wakukhuluma kamhlophe lokho, uPhethro wasemdonsela eceleni wamkhuza.

33Kodwa waphenduka wakhangela abafundi bakhe, wasemkhuza uPhethro wathi, “Suka emuva kwami, Sathane! Kawunakani ngezinto zikaNkulunkulu, kodwa ngezinto zabantu.”

34Wasebiza ixuku labantu kanye labafundi bakhe wathi, “Aluba umuntu efuna ukungilandela, kumele azidele athathe isiphambano sakhe angilandele. 35Ngoba yilowo ofuna ukulondoloza impilo yakhe izamlahlekela, kodwa olahlekelwa yimpilo yakhe ngenxa yami kanye levangeli uzayilondoloza.

36Kumsizani umuntu ukuzuza wonke umhlaba kodwa alahlekelwe ngumphefumulo wakhe? 37Loba, kuyini umuntu angakunika kube yinhlawulo yomphefumulo wakhe na? 38Aluba umuntu elamahloni ngami kanye lamazwi ami kulesi isizukulwane esifebayo lesonayo, iNdodana yoMuntu izakuba lamahloni ngaye nxa isifika enkazimulweni kaYise lezingilosi ezingcwele.”